Fagur Fiskur

August 29, 2013

Fagur fiskur eru sjónvarpsþættir sem sýndir voru á RÚV. Markmið þáttanna var að kynna fyrir áhorfendum alla þá ótrúlegu möguleika í því frábæra hráefni sem finnst í hafinu í kringum landið. Hugmyndin af þáttunum kviknaði hjá Gunnþórunni Einarsdóttur matvælafræðingi hjá Matís og Brynhildi Pálsdóttur vöruhönnuði. Mastersverkefni Gunnþórunnar í matvælafræði við Háskóla Íslands fjallaði um stöðu fiskneyslu hjá ungu fólki á Íslandi. Niðurstöður verkefnisins sýndu að mikil þörf væri fyrir að efla bæði þekkingu fólks og neyslu þess á sjávarfangi. Út frá þessu verkefni kviknaði sú hugmynd að gera sjónvarpsþætti þar sem sjávarfang landsins væri í aðalhlutverki. Þær Gunnþórunn og Brynhildur fengu Svein Kjartansson matreiðslumann, Áslaugu Snorradóttur ljósmyndara og Margréti Jónasdóttur hjá Sagafilm í lið með sér til þess að láta hugmyndina verða að veruleika. Hugmyndin var þróuð áfram og útfærð af Áslaugu, Sveini og Hrafnhildi Gunnarsdóttur leikstjóra hjá Sagafilm.

Hér má sjá seríu 1 og 2 af Fagur fiskur.

Gerð þáttana var styrkt af AVS rannsóknarsjóði í sjávarútvegi.

Sveinn Kjartansson er matreiðslumeistari og eigandi veitingahússins Borðstofan, sem er á fyrstu hæð í Hannesarholti við Grundarstíg í Reykjavík.
Sveinn hefur komið víða við á starfsferli sínum.  Hann útskrifaðist sem matreiðslumaður frá Hótel- og veitingaskóla Íslands árið 1985 og hélt fljótlega utan til Oslóar þar sem hann vann sem matreiðslumaður. Fljótlega lá leiðin til Amsterdam þar sem Sveinn starfaði um áraraðir. Hann vann á ýmsum veitingastöðum á ferðalögum sínum um heiminn og hefur starfað á erlendri grundu lungað úr starfsferlinum. Við og við kom hann heim og setti m.a. upp veitingastofuna á Listasafni Íslands, þegar það flutti í núverandi húsnæði. Einnig starfaði hann við veitingahúsið Við tjörnina og frá árinu 2002 starfrækti Sveinn Fylgifiska, sérverslun með sjávarfang, ásamt fleirum, sem var brautryðjandi á Íslandi í fiskréttum.

Hann hefur unnið að þremur þáttaröðum um matreiðslu fyrir sjónvarp, Fagur fiskur I, sem Sagafilm og Matís framleiddi (Eddu-verðlaunin 2011 sem menningar- eða lífsstílsþáttur ársins), Allt upp á einn disk, sem RÚV framleiddi  og nú síðast Fagur fiskur II, framleiðandi Sagafilm og Matís. Þáttaraðirnar voru allar sýndar á RÚV.

Sveinn er höfundur af 60 uppskriftum í Fiskbók Hagkaupa sem kom út árið 2004 og nú í október kemur út bókin Fagur fiskur, með uppskriftum Sveins, sem Forlagið gefur út og byggir á báðum þáttaröðunum Fagur fiskur I og II.

Áslaug Snorrasdóttir ljósmyndari hefur sérhæft sig í að mynda mat. Ritstýrði og myndaði About Fish, sem fékk hönnunarverðlaun FÍT  2003, og bókina Náttúran sér um sína, stemmingsbók um Rúnar Marvinsson 2008. Auk þess hefur hún myndað í á þriðja tug matreiðslubóka og skrifað texta um mat og matarmenningu fyrir tímarit eins og Conde Nast traveler, W, Iceland Review og Atlantica. Frá 1991 til 2004, sá Áslaug um matarþætti í Morgunblaðinu, og ritstýrði og myndaði í M tímarit Morgunblaðsins um mat og vín.

Frá árinu 2007, hefur Áslaug rekið fyrirtækið Pikknikk sem sérhæfir sig í einstökum matarupplifunum, og veislum.